Klivlend Kavalers — Ohayo ştatının Klivlend şəhərini təmsil edən peşəkar basketbol klubu. NBA-da Şərq Konfransının Mərkəzi qrupunda yer alır. Komanda 1970-ci ildən Portlend Treyl Bleyzers və Buffalo Breyvs ilə birlikdə əlavə komanda kimi fəaliyyət göstərməyə başlayıb. Ev oyunlarını ilk olaraq 1970–1974-cü illərdə Klivlend Arenada,1974–1994-cü illərdə isə Richfield Coliseum-da keçirib. 1994-cü ildən isə komanda oyunlarını Klivlendin mərkəzində yerləşən Quicken Loans Arenada keçirir. Dan Gilbert 2005-ci ilin martından komandanın sahibidir.
Kavalers liqada çıxış etdikləri birinci ilin ilk 15 oyununu uduzmuş və ilk 5 il ərzində Şərq konfransında 6-cı yerdən yüksəyə qalxa bilməmişdi. Komanda 1976-cı ildə ilk Mərkəzi Divizion çempionluğunu qazanmışdır. Həmin ildə onlar həm də tarixlərində ilk dəfə Pley-offa və Şərq konfransının finalına yüksəlmişdir. Komanda 1980-ci ildə Ted Stepien tərəfindən satın alındı. Onun səlahiyyəti müddəti 6 məşqçi dəyişiklikliyi, mübahisəli transferlər və draft qərarları və 15 million $ maddi itki ilə yadda qalmışdır. Kavalersin bu zaman nəticəsi 66–180 idi və 24 oyunluq məğlubiyyət seriyasına imza atmışdı.
Corc və Qordon Qundlar 1983-cü ildə komandanı satın aldılar. 1980-ci illərin son illəri və 1990-cı illər ərzində Mark Prays və Bred Doferti tərəfindən rəhbərlik edilən Kavalers müntəzəm pley-off iddiaçısına çevrildi və 1992-ci ildə Şərq konfransının finalına qədər yüksəldi. Komandanın 1998-ci ildə pley-offlardakı çıxışından sonra Kavalers altı ardıcıl ildə pley-offlarda iştirak edə bilməmişdir. Klivlend 2003-cü ilin seçmələrində ilk sıra seçməsini qazanmış və LeBron Ceymsi seçmişdir. Ceymsin və Zidrunas İlqauskasın gəlişi ilə Kavalers 2005-ci ildən yenidən müntəzəm pley-off iddiaçılarına çevrildilər. Onlar 2007-ci ildə Şərq konfransının çempionu olduqdan sonra NBA Finallarında komanda tarixində ilk çıxışlarını etdilər. Növbəti 3 ildə Klivlendin NBA Finallarına çıxa bilməməsindən sonra, Ceyms 2010-cu ildə Mayami Hitə qoşuldu. Bunun nəticəsində Kavalers 2010–11 mövsümünü 26 oyunluq uduzma seriyası da daxil olmaqla konfransda sonuncu olaraq tamamladı. 2010–2014-cü illərdə komanda NBA seçmələrinin ilk seçimini üç dəfə- 2011,2013 və 2014-cü illərdə qazanmışdır. 2011-ci ildə onlar Kayri İrvinqi, 2013-cü ildə Entoni Benneti, 2014-cü ildə isə Endryu Vigginsi seçmişlər.
LeBron Ceyms 2014-cü ildə Kavalersə qayıtdı və komandanı 3 ardıcıl NBA Finallarına çıxardı. 2016-cı ildə Kavalers özünün ilk NBA çempionluğunu qazandı. 2016-cı ildə NBA Finallarında Klivlendin qələbəsi tarixdə ilk dəfə bir komandanın 3–1 hesabla geriyə düşməsindən sonra geri dönüş etməsi ilə yadda qaldı. 2016–2017-ci ilə qədər Kavalers 21 dəfə pley-offlarda çıxış etmiş, 6 Mərkəzi Diviziya çempionluğu, 4 Şərq Konfransı çempionluğu və bir NBA titulu qazanmışdır.
Klivlend, Ohayo
