Askalaf Aresin Oglu - Wikipedia

Askalaf Ares və Astioxanın oğlu idi. O, Minya Orxomeninin padşahı olmuşdur. Aleksey F. Losev vurğulamışdır ki, Askalaf atasına xas cilovsuzluq, vəhşilik və qəddarlıq xüsusiyyətlərini nümayiş etdirmişdir. Psevdo-Apollodor Askalaf və onun qardaşı İalmeni Lik və Pernidanın oğulları, Arqolida yerliləri adlandırmışdır. Mifin bu cür interpretasiya edilməsi başqa heç bir yerdə müşahidə edilməmişdir. Lukian Aresin Askalafın atası olması mifinin rasional şərhini vermişdir. Onun fərziyyələrinə görə, Askalaf Ares tərəfindən himayə olunurdu və buna görə də o, ilahi mənşəyə malik bir şəxs hesab olunurdu. Tarixçi Lev S. Kleyn "Askalaf" və tibb tanrısı "Asklep"in adlarında oxşarlıq tapmışdır. O, bu əsasda qədim Yunanıstanda arxaik dövrdən əvvəlki vaxtlarda müəyyən bir tanrının mövcudluğu haqqında fərziyyə irəli sürmüşdür. Bu tanrının obrazı Apollonun oğlu Asklep və Aresin oğlu Askalafa bölünmüşdü. Onların hər ikisi yaralarla bağlıdır, çünki biri yaraları sağaldır, digəri isə yaraları yaradır.

Psevdo-Apollodorun yazdıqlarına görə, Askalaf Qızıl yun uğrunda Arqolidadan Kolxidaya səfər edən Yason və digər personajlara qoşulmuşdur. Askalaf Yelena ilə evlənməyə namizəd olan onlarla insandan biri idi. Yelenanı övladlığa götürmüş atası, Sparta padşahı Tindarey çətin seçim qarşısında qalmışdı. Bir çox məşhur döyüşçülərdən, padşahlardan və tanrı oğullarından Yelenanın həyat yoldaşına çevriləcək bir dost və onlarla qəzəbli düşmən əldə edə bilərdi. Odisseyin məsləhəti ilə Tindarey bütün bu insanları Yelenanın gələcək həyat yoldaşını tanımaq üçün and içməyə, ən əsası isə təhlükə və təhqir zamanı ona köməyə gəlməyə məcbur etmişdir. Sonda Menelay Yelenanın həyat yoldaşı olmuşdur, lakin Askalaf Tindareyə verdiyi anda görə özünü ömürlük borclu hala gətirmişdi. On il sonra Troya şahzadəsi Paris ilahə Afroditanın köməyi ilə Yelenanı oğurlayan zaman Askalaf və ordusu Troya şəhərini fəth etmək üçün yola çıxan axey ordusuna qoşulmağa məcbur qalmışdır.

Askalaf ilk dəfə Homerin "İliada" əsərində qardaşı İalmen ilə birlikdə Miniya Orxomeni və Aspledondan Troya şəhərinə 30 gəmi gətirən bir personaj kimi xatırlanmışdır. Tarixçilər Askalafın qeyd olunduğu "İliada"nın "Gəmilər kataloqu" fraqmentini təhlil edən zaman onun "gecikmiş" təbiətinə vurğu etmişdilər. Bir versiyaya görə, Askalafın komandanlığı altında olan orxomenlilər beotiyalılar ilə fokidalılar arasında yerləşirdilər. Poemanın mətninin bir qədər növbəti hissələrində qeyd edilmişdir: "Hər iki lider Fokida milislərinin sıralarını düzdülər / Beotiyalıların yanında, sol cinahda, döyüşə silah aldılar". Mətndə elə göstərilmişdir ki, sanki onların arasında orxomenlilər yox idi. Bu əsasda tarixçilər belə qənaətə gəlmişdilər ki, Askalaf və İalmənin ordusunu haqqında hissələr orijinal mətnə sonradan daxil edilmişdir.

Askalaf adına Yupiter ətrafında yerləşən Troya asteroidi 21 yanvar 1988-ci ildə Palomar Rəsədxanasında ABŞ astronomları Karolin və Yucin Şumeyker tərəfindən kəşf edilmişdir.