Elnare Tofiqqizi - Wikipedia
Elnarə Niftəliyeva və ya Elnarə Tofiqqızı (tam adı:Niftəliyeva Elnarə Tofiq qızı) — ədəbi tənqidçi,[1] Milli Kitab Mükafatının ekspert qrupunun üzvü, 2012–2013-cü illərdə Bakı Slavyan Universitetinin Yaradıcılıq fakültəsinin dekanı.[2]
| Elnarə Tofiqqızı | |
|---|---|
| Niftəliyeva Elnarə Tofiq qızı | |
 | |
| Doğum tarixi | |
| Doğum yeri | Yevlax, Azərbaycan SSR, SSRİ |
| Vəfat tarixi | (35 yaşında) |
| Vəfat yeri | Bakı, Azərbaycan |
| Dəfn yeri | Bakı |
| Vətəndaşlığı |
 SSRİ→ Azərbaycan |
| Milliyyəti | azərbaycanlı |
| Təhsili | Bakı Dövlət Universiteti |
| İxtisası | Filoloq |
| Fəaliyyəti | Ədəbi tənqid |
| Fəaliyyət illəri | 2000-2013 |
Həyatı və təhsili
redaktəElnarə Tofiqqızı 1977-ci il 24 dekabrda Yevlaxda anadan olmuşdur. Yevlax şəhərindəki 4 saylı orta məktəbdə təhsil alıb. Bakı Dövlət Universitetinin Filologiya fakültəsini bakalavr (1994–1998) və magistr (1998–2000) pillələri üzrə qırmızı diplomla bitirib.
E.Tofiqqızı 2013-cü il 20 sentyabrda "Medi Sina" klinikasında cərrahiyyə əməliyyatı zamanı həkim səhlənkarlığından dünyasını dəyişmişdir.[3]
Ailəsi
redaktəAnar Niftəliyevlə ailəli olub. İki övladları var.
Fəaliyyəti
redaktəƏmək fəaliyyəti
redaktə2001–2004-cü illərdə Azərbaycan Milli Elmlər Akademiyasının Ədəbiyyat İnstitutunun folklor ixtisası üzrə aspirantı olub. 2000-ci ildə Azərbaycan Yazıçılar Birliyinin katibliyində çalışıb, 2002-ci ildən AMEA Ədəbiyyat İnstitutunun Folklor Mərkəzində, daha sonra isə Folklor İnstitutunda elmi işçi olub. 2011-ci ildən Bakı Slavyan Universitetinin Yaradıcılıq fakültəsinin dekan müavini, 2012-ci ildən isə dekanı olub.
Elmi fəaliyyəti
redaktə"Koroğlu" dastanının toplanması və nəşri iqtiqamətində tələbə ikən çalışıb. 1996-cı ildə Abbas Rəcəblinin 30-cu illərdə dərc etdirdiyi müxtəlif qəzet və dərgilərdəki "Koroğlu" qollarını toplayaraq ön söz və izahla kitab halında dərc etdirib. E.Tofiqqızı 2000-ci ildə 1913-cü ildə Rza Zaki Lütfibəylinin "Orucov qardaşları" mətbəəsində dərc etdirdiyi, "Koroğlu" dastanının nəşri sahəsində ilk təcrübələrdən olan "Koroğlu" dastanını ərəb əlifbasından trasliterasiya edərək ön söz, lüğət və şərhlə dərc etdirib. Nəhayət, 2005-ci ildə "Koroğlu" dastanının 28 məclisdən ibarət olan ən böyük, mükəmməl və hələlik ən qədim variantı sayılan Təbriz variantını transliterasiya edərək ön söz və izahla dərc etdirib. Qeyd edək ki, bu versiya elmdə eyni zamanda Tiflis nüsxəsi kimi tanınır və 1990-cı ildə tanınmış alim Dilarə Əliyeva kitab üzərində işə başlamış, iki məclisi trasliterasiya etsə də, faciəli ölümü səbəbindən proses yarımçıq qalmışdı. E.Tofiqqızının 30-a yaxın elmi məqaləsi müxtəlif elmi dərgilərdə nəşr olunmuşdur. "Koroğlu" dastanının toplanması, nəşri təcrübəsi və müqayisəli təhlili" adlı dissertasiyası müzakirədən keçərək müdafiəyə buraxılsa da, dünyasını dəyişməsi səbəbindən müdafiə baş tutmamışdır. E.Tofiqqızı müasir ədəbi nümunələrlə bağlı tənqidi məqalələri ilə də tanınırdı. Onun xalq yazıçısı Kamal Abdulla, Pərviz Cəbrayıl, Kəramət Böyükçöl, Qan Turalı da daxil olmaqla, müasir yazarların yaradıcılığı ilə bağlı 20-dən çox məqaləsi işıq üzü görüb. E.Tofiqqızı Milli Kitab Mükafatının ekspert qrupunun üzvü idi.
Anılması
redaktə24 dekabr 2013-cü ildə Bakı Slavyan Universitetində universitetin rektoru, yazıçı Kamal Abdulla, Rüstəm Kamal, Qan Turalı, Azad Qaradərəli, Sayman Aruz, tənqidçi Cavanşir Yusifli, Qəşəm Nəcəfzadə, Rəbiqə Nazimqızı və başqaları Elnarə Tofiqqızı haqqında xatirələrini, düşüncələrini bölüşüblər.[4]
İstinadlar
redaktə- ↑ ""Ədəbi tənqid çox mürəkkəb və rəngarəng filoloji sahədir"". 2023-07-08 tarixində arxivləşdirilib. İstifadə tarixi: 2020-12-21.
- ↑ "Səhiyyə Nazirliyi Elnarə Tofiqqızının ölümü ilə bağlı araşdırmaya başlayır". 2021-02-25 tarixində arxivləşdirilib. İstifadə tarixi: 2020-12-23.
- ↑ "Elnarə Tofiqqızının ölümü ilə bağlı məhkəmə davam etdirilib". 2023-07-08 tarixində arxivləşdirilib. İstifadə tarixi: 2020-12-21.
- ↑ Slavyan Universitetində tənqidçi Elnarə Tofiqqızı anılıb[ölü keçid]
